ማነዉ የሚደሰት?

ማነዉ የሚደሰት ማነዉ የሚጨፍር ?
ሚሊኒየም ብሎ ከወያኔ ጋር።

ጨለማ ለዋጠዉ ላጣ ብርሃኑን

ምድሩን ለተቀማ የያቆብ የኩሽን።

ኃይሉን ላስረከበ ላሟጠጠ ትዕግስት

መሪ ለሌለዉ መስፍን ታግቶበት።

ይሄ ሚሊኒየም ምንድን ነዉ ተስፋችን

ከምንዳክርበት ከማጡ መዉጪያችን።

ታላቅ ሚሊኒየም ድንቅ የታየበት

ሰርክአለም ቃሊቲ የወለደችበት።

አባቱ እስክንድር በግፍ የሚማቅቅ

ይህ ነዉ ሚሊኒየም አለምን ሚያስደንቅ።

የወጣት የህፃን የሽብሬዎች ደም

ገና መች ደረቀ ልንል ሚሊኒየም።

ደበበ ግዛቸዉ ብርቱካን ሚደቅሳ

ምን በበደሉ ነዉ የሚያዩት አበሳ።

መቼ ኢዩኤል ብቻ ታጎረ ቃሊቲ

እዉቀት ሁሉ እዚያ ነዉ ምርጥ ዩኒቨርሲቲ።

የሚሊኒየም የሦስት ትዉልድ ፈርጦች

እንዴት ነዉ የምንጨፍር ታግተዉ በአፋኞች።

ኃይሉን ሊያሳየን ነዉ አርአያ ሊሆን

በፈቃዱ ወጥቶ የሰዋ እራሱን።

በጨቀየዉ መሬት በወጣቱ ደም

ማነዉ የሚጨፍር በሚሊኒየም።

አሁን ሊለዩ ነዉ የእፉኝት ልጆች

በበጎቹ መሀል ያሉ ተኩላዎች።

ሙሉነህ አትበሉኝ ጎሎብኛል እኔ

አንዱአለም ተጋርዶ አይኑ በወያኔ።

የኔነህ የምለዉ ብሩክ ልጅ አዛኝ

ዝብጥያ ወርዶ በግፍ ሲሰቃይብኝ።

ሚሊኒየም ብሎ የሚል ደፋ ቀና

ታሪክ አይረሳዉም ከሀዲ ነዉና።

ከቶ እንዴት ሊረሱ ዕልፍ ዐዕላፎች

ደብተራዉ ፀጋየ እነዚያ ምርጦች።

በትግራይ ወያኔ ታፍነዉ በጉድጓድ

ሚሊኒየም ብሎ እንዴት ነዉ ሽርጉድ።

አንድ ሆነን እንጩህ በያለንበት

ሚሊኒየም ይሁን ማብቂያ የእንግልት።

ብርሀኑ እንዲበራ መና እንዲወርድልን

ቄሱ ዳዊት ይዞ ሁሌ የሚደግምልን፡፤

አንዳርጋቸዉ ብሎ ባህታዊ ዘግቶ

ዘወትር ሲፀልይ ለኢትዮጵያ ተግቶ።

እኛ ሚሊኒየም ልንመታ ዳንኪራ

ይለያል ዘንድሮ የሕዝብ ባላጋራ።

በአስቻለዉ ከተማ ሞትና እርዛት

ጌታቸዉ ይፈርዳል ሆኖ ሰማይ ቤት።

አስራት የሚከፍሉት ልጆቹ በቅን

ቀርቧል ሊያሳያቸዉ ብርሀኑ መስፍን።

ከነፍስ ገዳዮች ይቅር ዛሬ ኅብረት

በደም ከታጠቡ የሚሊኒየም ዉጤት።

ላለፉት ዘመናት ኖርን በጦርነት

በረሀብ በበሽታ በስደት ባርነት

ከእንግዲህ ይብቃን እስር ሞት እንግልት

ሚሊኒየም ይሁን ለሁላችን ህብረት።

ዛሬ እናሳያቸዉ ወያኔዎችን

ነፃ የምንወጣበት አንድነታችንን።

ሚሊኒየም ይሁን ለእኛ መማማርያ

ለኢትዮጵያ ልጆች ይቅር መባባያ።

እፍረታችን ይብቃ ስደት ዉርደታችን

ከልመና እንዉጣ በሚሊኒየማችን።

እጃችን ይዘርጋ በአንድነት እንዘምር

ቃሉ ይፈፀም ዘንድ በቃል ኪዳን አገር

በእናት ኢትዮጵያ በያዕቆብ በኩሽ ምድር።

ማነዉ የሚደሰት ማነዉ የሚጨፍር
ሚሊኒየም ብሎ ከወያኔ ጋር።

ከአስጊ - ( በርን - ስዊዘርላንድ )
የካቲት 2 ቀን 1999 ዓ. ም.