ሁሌ ተደናግጦ - ሁሌ ተሸብሮ፣
በፀየፈ ተግባር - ሁሌ አቀርቅሮ፣
ሲወጡ ሰገቡ - ሁሌ ተደብቆ፣
ፍቅር ካላገኙ - ከሰው ጋር ተኑሮ፣
ስህተት ካላረሙ - ካለፉት ተምሮ፣
ሰው መባል ምንድነው?
.... የቱስ ላይ ነው ኑሮ!?

ሰው እውነትን ንቆ!?
.በሐሰት ተዘፍቆ፣
ከእሱነት መለያው ከሕሊናው ርቆ፣
ከጊዚያዊ ስጋው - ከንዋይ ተጣብቆ፣
ከነገ ክቡር ስም - የዛሬ ሆድ ልቆ፣
ደስታን ሳያሸቱ - ከሕዝብ ጋር ስቆ፣
ገላን ለይስሙላ - በከፈን ደብቆ፣
ሁልጊዜ ተጨንቆ - ሁልጊዜ ተሰቆ፣
እንኳን በሐገር ላይ - ባህር ማዶ ርቆ፣
አዳራሽ ለመግባት - ዙርያ ተጠብቆ፣
ሲገቡ በጓሮ - ሲወጡ በጓሮ፣
ኑሮ ነው አትበሉኝ - የቱ ላይ ነው ኑሮ!!
የቋጠሯትስ ብር - መቼ ቀን ተበልቶ፣
ምን ቀን ተረጋግቶ - ሁሌ እንቅልፍን አጥቶ፣
ታዲያ
ስው ራሱን አስሮ - ነፃነቱን አጥቶ፣
ሰውን እንዴት ያስራል - ምን አቅም አግኝቶ!?

እነዚያ ተበተን ተለያዩ ሲሉ፣
እነዚህ በፍቅር አንድ እንሁን አሉ፣
እነዚያ ጥላቻን ቂም ሲያቆጣጥሩ፣
እንዚህ ምህረትን ...
ይቅር መባባልን - ፍቅርን አስተማሩ፣
እነኚያ በሃይል - በጥይት ሲያመልኩ፣
እነዚህ በብዕር - ጥይት ይቅር አሉ፣
ሃገርህን ጥለህ - ተሰደድ ሲባሉ፣
ለጊዚያዊ ጥቅም - ለሆድ ሳያደሉ፣
ደስታውም ሐዘኑም ..
ከሕዝባችን ጋራ ባገራችን አሉ፣
እነኚያ ተጨንቀው - እንዲያው ሲያስመስሉ፣
ከሚድያ ጀርባ - አለን አለን ሲሉ፣
ያብሮነትን ክብር - እነዚህ አሳዩ፣
ሆ .! እያለላቸው - ምድር ሳር ቅጠሉ፣
ሕዝብ መሃል ገብተው ፍቅር ይህ ነው አሉ፣
እናም ሰርፀው ገቡ፣
በሕፃን በአዛውንቱ እየተሞገሱ፣
ስያሜ እስኪቸግር - መንፈስ እስኪባሉ፣
በጠለቀ ቅርበት - አካሌ ተባሉ፣
እናም በሕዝባችን በደሙ ውስጥ አሉ፣
ታድያ መች ታሰሩ? - ማን ነው የታሰረው?!